**షాపింగ్**

ఆకాశం నిండా నల్లమబ్బులు
మనసుకూడా ముసురేసింది
ఏమీ తోచక బ్లాక్ సిగరెట్టొకటేసుకుని
దారి వెంబడి నడక

కాళ్ళకు బురద అంటకుండా చెప్పులడ్డు
చెప్పాలంటే నవ్వొస్తోంది గానీ
సిగరెట్టు తడవకుండా గొడుగడ్డు

ఏమీ లేని దారిలో ఒకటే షాపు
పేరు టైమ్ షాపీ
జ్ఞాపకాలమ్మబడును అని ఒక సైన్ బోర్డు

వస్తువు వాడిన తరువాత చెల్లించవచ్చట
ధర వజ్రపుతునకల్లా జారే రెండు కన్నీటి చుక్కలు

చేసేదేమీ లేదు
కళ్ళజోడు సవరించుకుని లోపలికెళ్లడమే