Right disabled

Tuesday, November 6, 2018

**ఇంతకన్నా ఏం చేయగలను?**

మనసు ముక్కలైతేనేం
మంచిదే

ముక్కలన్నీ ఏరుకుని
తిరగలిలో వేసి
ఇంకా నున్నటి పొడి చేస్తాను

పర్వత శిఖరాలపై కొంత
పక్షుల రెక్కలపై కొంత
పువ్వుల రేకులపై కొంత
నదుల్లోనూ
గాలిలోనూ
వీలైతే ఇంకొంచెం ఎక్కువగా
సముద్రంలోనూ

నిండు మేఘాలు జాలువార్చే
జలతారు చినుకుల సరాల్లోనూ

చిగురించే ఆకులపైనా
రాలిన పండుటాకులపైనా

అలా చల్లి వస్తాను

పొగమంచులో మరిచిపోకుండా కలిపేసి వస్తాను
అరణ్యాన్ని అస్సలు వదలను

నడిచిన దారులకు కొంత పంచుతాను

అవన్నీ తిరిగొచ్చి 
దీపం చుట్టూ 
తెర కట్టుకుని చెప్పే కథలన్నీ 
వెల్లికిలా పడుకుని వింటాను

వాటి మాటల్లోని 
గంభీరమైన అందం కోసం 
ఎదురుచూస్తాను

సాకారమై వస్తే మోకరిల్లి
నన్ను నేను అర్పించుకుంటాను

లేదూ

అంతటి అందాన్ని 
ధ్యానిస్తాను

ఇంతకన్నా ఏం చేయగలను?