**కాలం లేనిది**

నేను తనని ప్రేమిస్తానంతే 
తను నన్ను గొప్పగా ప్రేమిస్తుంది

వత్తిని మలిగించే చిన్న మంటలా 
వెచ్చనైన ప్రశాంతతతో 
నన్ను ఇష్టపడుతుంది

నేను హృదయంతో మాత్రమే ప్రేమిస్తానేమో

చల్లటి గాలి వీచినంత స్వేచ్ఛగా
గువ్వలు కూసినంత మంద్రంగా
మంచు పరుచుకున్నంత నిశ్శబ్దంగా 
మసక వెన్నెలంత దట్టంగా
మొలక పెరిగినంత ప్రాణంగా
సముద్రమంత కల్లోలంగా  

కాలంతో పాటు ప్రయాణించినంత వేగంగా

ఇంకా చాలా రకాలుగా ప్రేమిస్తుంది

ఒక్కోసారి అంత గాఢత అర్థం కాదు కూడా

నన్ను ఈ ప్రపంచానికి కట్టి ఉంచే 
ఆకర్షణ శక్తి తను

తన ప్రేమకు కాలనియమం లేదు

అదొక జీవధార
తనొక ప్రణయమూర్తి