**పనికొచ్చేది**

హోమగుండంలో పూర్ణాహుతైన
గుమ్మడికాయలాంటి
మెత్తటి రాత్రి

ఒకరివెంట ఒకరు
ఊరికే పరుగెత్తే
పిచ్చికుంకల్లాంటి గడియారపు ముళ్ళు

ఆ కాసేపటికీ హస్తభూషణమయ్యే
పెద్ద కప్పులోని టీ అంటే
నాకన్నా వాటికే ఇష్టం

కప్పును పట్టుకునే చేతి వేళ్ళనూ
తాకీ తాకనట్టు తాకే పెదాలనూ
చప్పరించే నాలుకనూ చూస్తూ
కప్పులోని టీ అయిపోయేంతవరకూ
రాత్రి
గడియారం
అలానే నిల్చుండిపోతాయి

అలా రాత్రిని కాలాన్ని నిలబెట్టే టీ కోసం
స్టవ్ రోజూ ఎదురుచూస్తుంది

ఒక్కో తేనీటి చుక్క
గొంతుదిగే ఒకానొక జ్ఞాపకం
నిజంగా జీవితంలోకి వెళ్లాలనుకున్నపుడు పనికొస్తుంది