**ఊరు**

కాస్త పచ్చదనం కనిపించినా 
పారే నది కనిపించినా
గుబురు పొదలపై 
గుత్తులుగా పూసిన పూలు కనిపించినా 
కాస్త వెన్నెల ఎప్పుడైనా తడిమినా 
కొంచెం చల్లని గాలి
ఎప్పుడైనా గుసగుసలాడినా 
మెత్తటి తడి మట్టి ఎప్పుడైనా 
పాదాలను ముద్దు పెట్టుకున్నా 
గుడి గంటలు లీలగా వినిపించినా 
ఆకాశం నిండా చుక్కలు చూసి 
చాలాకాలమైందనిపించినా 
గుంపులు గుంపులుగా ఎగురుతున్న
పిట్టలు కనిపించినా
ఎవరి మాటల్లోనైనా 
కాస్తంత మొరటుతనం
మంచితనం కనిపించినా 

నీకు తెలీకుండా
నీ కంట్లో ఉబికిన తడి 
నీ చెంపలను తడిపితే 
నీలో నీ ఊరు
ఇంకా సజీవంగానే ఉన్నట్టు

**శృంగారాలు – 6**

శరీరాలకు ఆకలెక్కువ 
నేను నిన్ను నువ్వు నన్ను 
కలిసిన ప్రతిసారీ 
మన ప్రమేయం లేకుండానే 
శరీరాలు వాటి ఆకలినవి తీర్చేసుకుంటాయి
మొహమాటాలే లేకుండా

నీలో నేను నాలో నువ్వు మాత్రం 
ఇదేదీ పట్టనట్టు
ఒకరి కళ్లలోకి ఒకరు 
చూస్తూ కూర్చుంటాం

ఒళ్ళు పొంగి కందిన గాయాలూ 
మనసులు తడిసిన సమయాలూ 
మిగిలిపోతాయి

**The Balcony**

Sometimes at nights
I just go in to my balcony
Where I feel the quieten
And talk to myself

Moonlight spills out of my balcony
It drowns me in to a lone path
It draws me on to a palanquin
This takes me to the world so far in me
Guised under a canopy of withered fabric

I clean the mess
I wash it with my bare hands
Then the moonlight spills there too
I am the moon
Then the whole world talks in to me

**సన్ ఆఫ్ టైమ్స్**

మెటలర్జికల్లీ అమాల్గమేటెడ్ తలుపులను కట్టుకున్న
కాళరాత్రి కవాటాలను బద్దలు కొట్టుకుని
ఉదయిస్తాడు వాడు
సూర్యుడు కాడు సుమా

అక్షరాలన్నీ నరాలు తెగినప్పుడు రక్తం ఎగిసిపడ్డట్టు చిమ్ముతాయి
వాడి పుట్టుకనుంచీ
విత్ ఏజ్ కమ్స్ విజ్డమ్ ని తిరగరాసి
బర్త్ టీచెస్ యూ విజ్డమ్ అంటాడు
డిస్గైస్డ్ రాళ్ళలాంటి మస్తిష్కాలు కరిగి ప్రవహిస్తాయి
వాడి మాటలకు

వాడు తెరిచిన దారి నుంచీ రాలిన ప్యాకెట్స్ ఆఫ్ లైట్ ధాటికి
సీసపు సీళ్ళు కావాలని వేసుకుని
కాంతి మాకందట్లేదని ఏడ్చే కళ్ళు
భళ్ళున తెరుచుకుంటాయి

ఇంకేం కావాలీ ప్రపంచానికి
నిజాన్ని చూసింతర్వాత
అర్థమైనవారికి అర్థమైనంత

**అరూపరూపి**

రూపము లేదని అనుకునేలోపు
ఒక రూపం ఎదుట సాక్షాత్కరిస్తుంది
రూపముందని అనుకునేలోపు
ఆకార రహితమని తెలుస్తుంది
ఈ రెండూ నిజమే

ఒకదానినుంచీ వంద పుడతాయి
అవి వెయ్యి అవుతాయి
అలా ఒక్కొక్కటీ పెరిగి
అసంఖ్యాకమవుతాయి
అంతులేని ఈ క్రమంలో
ఏ అంకంలో పుట్టినదైనా
అదీ మొదటిదీ ఒకటే

అప్పుడు మొదటిది గొప్పా
మిగితావి గొప్పా
అసలా మొదటిది ఎక్కడనుంచీ వచ్చింది 

ఎక్కడ నాటింది అక్కడినుంచే ఇస్తుంది 
మరొక చోటునుండీ రాదుగా

అది ఉంటె ఇవి ఉంటాయి 
ఇవి లేకపోయినా అది మాత్రం ఉంటుంది 

అవి వర్తులాకారంలోనే ఎందుకుంటాయి
అంత దూరం వెళ్లి వాటిని చూసి
అవి అలానే ఉంటాయని ఎవరు చెప్పారు
అంత దూరం ఎవరు వెళ్ళగలరు

ఎలా పడితే అలా కాకుండా
ఎక్కడివక్కడే ఎలా ఉంటాయి
అలా ఎవరు పేర్చారు
పేరుస్తున్నప్పుడు చూసినదెవరు

సమాధానాలు దొరకని ప్రయాణమా ఇది
దొరికినా సంతృప్తి ఉంటుందా