**నదీమ దేహం**

దేశ దిమ్మరికేంలే
వాడలాగే తిరుగుతూ ఉంటాడు

నేను కూడా దాదాపు అంతే
నేనొకచోటే ఉన్నా
నేవెళ్లను కానీ
నిలకడ ఉండదు

కళ్ళు మూసుకుని తిరిగొస్తూ ఉంటా

చూడగలిగినవి చాలా
కనురెప్ప కదిలిస్తే చాలు

ఒక్క క్షణమే ఆగింది
అలలు పోటెత్తినట్టుండే 
నిన్ను చూసినపుడు

కేవలం చెయ్యే పట్టుకున్నది
వదిలేసినా
వదిలినట్టు లేదు

ఏముంటావే
ఆకాశంలో నదిలాగా

నదిలో చుక్కలు రాలి
తేలుతూ పోతున్నట్టు 
మెరుస్తూ

మెరుపు మెరుపుకూ 
వర్షం, మధ్యలో
జడి పట్టినట్టు

నువ్వుంటే
చుట్టూరా 
వర్షం వెలిసిన అడవి 
ఘాటు పరిమళం 


తిరిగి తిరిగి ఆగితే 
బాగుంది

ప్రయాణమిక చాలు
గమ్యం ఇదే
చూసింది చాలు
మరణం కావాలిప్పుడు

అంత అందాన్ని చూసినపుడు
ఆ కళ్ళతో ఇంకేదీ చూడకూడదు