**రంగులు**

నా మనసు ఎప్పటికప్పుడు

తన ఆలోచనల రంగులు పులుముకుంటూనే ఉంటుంది

అవి రకరకాల రంగులు

గుర్తించలేని రంగులు

అంతులేని రంగులు

రంగురంగుల రంగులు

వెలిసిపోని రంగులు

ఎన్ని రంగులు పులుముకున్నా

ఎక్కడో ఒక అంగుళం

ఖాళీగానే ఉంటుంది

ఇంకో కొత్త రంగును ఆహ్వానించి

అక్కున చేర్చుకోవడానికి

నాలోపలి రంగుల పొడలు

ప్రపంచమంతటా వ్యాపిస్తాయి కాబోలు

నా కళ్ళకన్నీ వర్ణరంజితంగానే కనిపిస్తాయి

రంగుల కలలు కనేందుకేననుకుంటాను

చీకటమ్మ నిదుర మందు చల్లి

నా కళ్లుమూసి

దాగుడుమూతలాడమంటుంది

కన్నీళ్ళకేం

స్ఫటికంలా స్వచ్ఛంగా ఉంటాయి

అన్నీ రంగుల్నీ ఇముడ్చుకుంటూ

అన్నింటినీ ప్రతిఫలిస్తూ

పుట్టుకా మరణాలు కూడా రంగులేనేమో

ఎన్ని రంగులో అన్నింటినిండా

అన్నీ బాగున్నాయి