**నగరసరాగాలు**

ముందు కారును
ముద్దెట్టుకుని మరీ

ముందుకెళ్లమని అడుగుతోంది

వెనుక కారు

నగరపు రోడ్లపై

-----------------

భాగమతీ నగర కంఠాన

మణిహారమనేమో

నెక్లెస్ రోడ్డు

మునిమాపు వేళ

మిలమిలా మెరుస్తోంది

-----------------

హుసేన్ సాగర్ లో కంపును

నేనొక్కడినే భరిస్తున్నప్పుడు

సమాజంలో కంపును

మీరింతమంది భరించలేరా

అని అడుగుతున్నాడు

మాటల్లోనూ చేతల్లోనూ

నిలకడలోనూ మార్పులేని

గౌతమ బుద్ధుడు

-----------------

పంజరంలో పక్షిలా

బాల్కనీలోని

కుండీలో మొక్క

ఆశగా చూస్తోంది

ఆకాశం వంక

-----------------

రెక్కలు ముడుచుకున్న స్వేచ్ఛ

కిచకిచమంటూ

పంజరంలో కనిపించింది

ఎర్రగడ్డ సండే మార్కెట్లో

-----------------

దాహం పాళ్ళు తగ్గట్లేదుగానీ

నగరంలోని నీళ్ళ ట్యాంకు రేటే

ఎగిసిన సునామీ అలలా

అలా పెరిగిపోతోంది

-----------------

రోడ్లు విచ్చలవిడిగా

తలస్నానం చేశాయి

వర్షపు నీటి నురగలో

-----------------

రైల్వేస్టేషన్ లో నిలబడితే

పొగమంచు వెలుగులో

మెలికలు తిరుగుతూ

వచ్చి ఆగింది

లోకల్ ట్రైను