**ధ్వంస రచన**

ముట్టుకున్నా మోగని
తంత్రులను చుట్టుకున్న
మూగ వీణవే

గాలిని కూడా చొరబడనీయని
వింత వేణువువే

రంగుల్నీ నీలో నిండనీయని
ఇంద్ర ధనుస్సువే

సుత్తికీ ఉలికీ స్పందించని
కరకు రాతి దేహానివే

నిన్ను కరిగించడానికి
ఏ చినుకులు కురవాలి

నిన్ను వెలిగించడానికి
ఏ కర్పూరాలు చల్లాలి

నిన్ను కదిలించేందుకు
ఎన్ని నెలవంకలు విసరాలి

నిన్ను వికసింపజేసేందుకు
నేనేన్ని సూర్యుళ్ళు కావాలి

నిన్ను చేరేందుకు
తెరుచుకోని ఎన్ని ద్వార బంధాలను
కూల్చుకుంటూ రావాలి

నా ప్రయాస అంతా
గాలిలో ధూళికణం
సముద్రంలో మంచినీటి చుక్క
వేలాది పలుగాకుల్లో ఒక ఎండుటాకు

అయినా ఎంతవరకూ నీ పట్టు
నా కోటి సముద్రాల అల
నిన్ను తాకేంతవరకే

నీ మనసును చుట్టిన
కరకు కోట గోడలను
బీటలు వార్చేందుకే
ఈ నా యత్నం