**శాండ్ విచ్ ఛాయ్ చిప్స్**

ఒకానొక శీతాకాలపు సాయం సంధ్య వేళ
మిత్రులతో కలిసి
అలా బయటకు వెళ్ళాను

చిన్న హోటల్ లో కూర్చుని
శాండ్ విచ్ ఛాయ్ చిప్స్
ఆర్డరిచ్చి
పిచ్చాపాటి కబుర్లలో పడ్డాం

పదార్థాలన్నీ వచ్చి
టేబుల్ పై కుదురుకున్నాయి

ఇలా శాండ్ విచ్ కొరికితే
ఆశ నిరాశల బ్రెడ్డు ముక్కల మధ్య
సుఖసంతోషాలలాంటి
టమోటా కీరాలు
నోటికి చల్లగా తగిలాయి

మేము లేకపోతే అది జీవితమే కాదంటూ
కష్ట నష్టాల్లాంటి
సాల్ట్ గరం మసాలాలు
నాలుకను చురచురలాడిస్తూ
మంచి రుచినిచ్చాయి

మధ్య మధ్యలో రస సౌందర్యాన్ని
నిండా నింపుకున్నంతగా ఉన్న
ఛాయ్ ని చప్పరిస్తూ
కరకరలాడే చిలిపితనాన్ని
ఒంటినిండా పూసుకున్న
చక్కటి గుండ్రటి చిప్స్ ని నములుతూ 

మొత్తానికి ఆ అరగంటలో
ఒక చిన్న జీవితాన్ని ముగించినట్టు లేచి
హోటల్ కొక సలాం కొట్టి 

బయలుదేరాం