**ఆస్వాదన**

నువ్వూ నేనూ జతచేరి

కాలుతున్న కోరికల నిప్పులతో

కొంటె కబుర్ల కుంపటేసుకుని

చలికాచుకుంటూ

నీ నా తమకాలు

గాఢంగా పెనవేసుకుంటే

వాతావరణ కేంద్రాలు కూడా

ఉలిక్కిపడేలా

అంత వేడి ఒకేసారి పుట్టి

అంత వర్షమూ ఒకేసారి కురిసింది మరి

చందమామ

తన వెన్నెల దారాల

పరదాలే కప్పుకుని

తుర్రుమని పారిపోతే

నువ్వు రాత్రి తీసి

విసిరేసిన

సిగ్గు పొరలు

ఎక్కడో ఆవల ఉన్న

సూర్యుడిపైబడి

ఇప్పటికీ బయటపడలేక

నానా తంటాలూ పడుతున్నట్టున్నాడు

అందుకేనేమో ఇంకా తెల్లారలేదు

నువ్వు లేచి

నీ సిగ్గులు వెనక్కి తీసేసుకుని

భానుడికి శుభోదయం చెప్పు

నే వెళ్ళి కాఫీ పెడతాను

మళ్ళీ నువ్వూ నేనూ కలిసి కూర్చుని

పొద్దుపొడుపును

ఆస్వాదిద్దాం