**నే నడిచిన దారి**

ఒక్కసారి

వెనక్కి తిరిగి చూసుకుంటే

నేను అభిమానించిన కళ్ళు

కురిపించిన

అలుసుదనపు చూపులు

దారినిండా పడున్నాయి

పిలిచిన వెంటనే

ముందువెనుకా చూసుకోకుండా

తనకోసం పరుగెత్తి

బొటనవేళ్లు చిట్లిన గాయాలు

అలాగే పచ్చిగా ఉన్నాయి

కారిన రక్తపు మరకలు

అలాగే నేలకంటుకుని ఉన్నాయి

అందరికన్నా

నువ్వే నాకు ఎక్కువని

తను చెప్పిన

అబద్ధాల పలుకులు

పదునైన ములుకులై

దారిపొడుగునా

నా కాళ్ళను గుచ్చుతూనే ఉన్నాయి

ప్రేమించి ప్రేమించి

ప్రేమకోసం తపించి

నీరసించి

సొమ్మసిల్లిన

నా మనసుపై

తను విదిల్చిన

రెండు చెమట చుక్కలు

ఆ నిజంలోని

నిష్టూరపు ఉప్పదనాన్ని

రుచి చూపిస్తూనే ఉన్నాయి

నా చేతిపై చెక్కుకున్న

తన పేరులోని అక్షరాలు

నేను తనపై పెంచుకున్న

మమకారం తగిలినప్పుడల్లా

ఎర్రగా కందుతూ ఉంటాయి

కానీ

నాకు ప్రేమపై

నమ్మకం పోలేదు

మనసుతో ప్రేమించానే గానీ

మనసున్న మనిషిని ప్రేమించలేదేమో

అందుకే ఇంకా వేచి చూస్తూ

నా ఎదురుచూపుల

తివాచీలు పరిచాను

నను ప్రేమించే ప్రేమకోసం